Daughters of Norway

Ved slutten av 1800-talet hadde om lag 800 000 nordmenn utvandra til Nord-Amerika. Utfordra av eit nytt land og språk, og av kjærleik til heimlandet, slo mange seg saman i ulike lag og organisasjonar. I 1895 vart Sons of Norway grunnlagt i Minneapolis, Minnesota. Føremålet var å hjelpa medlemmene og familiane deira i tider med sjukdom eller død og å støtta kvarandre i kvardagen. Med tida vart Sons of Norway òg ein stad for å vidareføra og ta vare på norske tradisjonar. Organisasjonen vaks raskt, og fleire avdelingar vart grunnlagde, både i Midtvesten og på Vestkysten.

Det må likevel understrekast at i byrjinga var Sons of Norway ein broderleg organisasjon, og berre menn kunne vera medlemmer. Men norske innvandrarkvinner var like stolte av arva si og hadde det same behovet for å samlast og støtta kvarandre.

I 1897 vart Daughters of Norway Minneapolis Lodge grunnlagd, følgd av Valkyrien Lodge nr. 1 i Seattle i 1905. Medlemmene kalla seg kjærleg systrer. Fleire losjar vart oppretta i norske innvandrarsamfunn rundt om i landet, og i 1908 vart ein Grand Lodge Daughters of Norway of the Pacific Coast stifta. Målsetjingane til Daughters of Norway i Midtvesten og på Vestkysten var like, men dei var parallelle grupper som aldri møttest eller slo seg saman.

Rundt 1910 byrja nokre Sons of Norway-losjar å ta imot kvinner, noko som skapte konkurranse. Men systrene heldt saman, og Daughters of Norway fortsette å blomstra. Den dag i dag er tanken om systerskap ein nøkkel til organisasjonen sin misjon og suksess. Det handlar om å koma saman med andre kvinner med same interesser og tankesett, om å læra, dela og hjelpa kvarandre. Og sjølv om Sons of Norway no tek imot kvinner som medlemmer, var det berre Daughters of Norway i Midtvesten som slo seg saman med mennene. Kvinnene på Vestkysten valde å halda seg uavhengige, sjølv om menn ofte deltek i mange av aktivitetane deira.

Alle medlemmer av Daughters of Norway vil fortelja deg at når du først er medlem, er du del av ein krins av vener og glede. På dei månadlege møta er det mykje god norsk mat med mange spesialitetar å nyta: kjeks, kringle, lefse og kransekake, for å nemna nokre få. Det vert arrangert kulturelle presentasjonar, ofte med fokus på historie eller norsk kunst og handverk, inkludert rosemåling, strikking og Hardangersaum, som òg er høgdepunkt ved den nasjonale samlinga kvar sommar. Norske høgtider vert haldne i hevd, og jul og 17. mai er store feiringar der mange av døtrene kjem i sine vakre bunadar.

Og Daughters of Norway-systrene elskar å syngja så mykje at dei har si eiga songbok, som inneheld syngbare omsetjingar av mange av Noreg sin kjære songar. Med kunnskapen sin om norsk kultur og musikk er mange døtrer òg aktive i norske kor og folkedansgrupper.

Mange av Daughters of Norway-losjane er oppkalla etter kjende eller framståande norske kvinner, eller norsk-amerikanske kvinner som gjorde store bidrag til lokalsamfunna sine. Det handlar om ei sterk kjensle av stoltheit over å vera norsk.

I dag er det òg eit større fokus på inkludering blant Daughters of Norway. For å verta medlem må du vera 13 år eller eldre; vera av norsk, dansk, finsk, islandsk, svensk eller samisk opphav; ha eller ha hatt ein ektefelle eller sambuar av norsk, dansk, finsk, islandsk, svensk eller samisk opphav; eller ha ein slektning som er gift med ein person av norsk opphav.

Kvar månad ser alle fram til å få tidsskriftet Døtre av Norge, med oppdateringar om nye medlemmer og høgdepunkt frå alle losjane.

Mange losjar tilbyr utdanningsstipend. Kvart år gjev Grand Lodge stipend til heiltidsstudentar ved universitet, tekniske skular eller yrkesfaglege liner, dersom dei anten er medlem av eller i slekt med eit medlem av Daughters of Norway.

Alt handlar om å heidra den norske arven og føra den vidare inn i framtida. Når du kjem til ditt første møte, er det første ordet du ofte høyrer eit hjarteleg Velkomen!

‍

_{Fanebilete: Daughters of Norway, Freya Lodge No. 1. Photograph Collection. In courtesy of Norwegian American Historical Association, Northfield, Minnesota.}

‍